Dan 1 | TVK | STEP | Melele xa suv toto Sehoiakim telaxat mol-Sudah xil huram tol (3), suv toto Nebukanesa tahal Babilon mei tevae tetel xil e moletin nan xil mei tekapis xol taon tahal Serusalem.

Daniel 1

Hi Pet Rat Horam Maxoe Hat tahal Isrel Mei Lapol mi Suv Toto tahal Babilon

Daniel 1:1-21; 2:48-49

1 Melele xa suv toto Sehoiakim telaxat mol-Sudah xil huram tol (3), suv toto Nebukanesa tahal Babilon mei tevae tetel xil e moletin nan xil mei tekapis xol taon tahal Serusalem. 2 Hi Suv maen suv toto Sehoiakim tahal Sudah be pe hen mol-Babilon xil. Misak ni moletin xil te vaeen na suv toto Nebukanesa mei laleh holesok xil xa bos xa di e Nim Eo na Hi. Lalehi ba lalingi di e rute tei xa lasorin holesok xil xa bos e nim na hi nae xil e kantri tahal Babilon.

3 Di, suv toto Nebukanesa misemae vat te polien e nim man, xa hisen Aspenas, tengan ha ilekis horam maxoe xil xa labos pe meten xa langgo vatimol na suv toto xil mu eilep xil tahal Isrel. 4 Suv toto misisi tengan ilekis ni horam maxoe xil xa valnaoxil bos e neta ti naxul vexil. Metisou e kilakilen ipolu en, e lihe hisit moletin xa likil holesok xil vus imanon tengan mei lipin kuhi tengan lipol mi suv toto e nim man xa eilep. E suv toto Nebukanesa biteni mi Aspenas tengan ipispis mi xil ni sexien te vulien e tisen e Arameak, sepinien na mol-Babilon xil. 5 Suv toto misemae ni mun tengan lilaxat kuh xil e lisa anien e uaen mi xil ixoni ngan taxa moletin xil xa ladi e nim man di langguri. E melele xa lipispisi mi xil ituxoh huram ihe tol, xil ha lipol sung mini e nim man.

6 E horam maxoe xil xa Aspenas telekis ni xil, xatel ak iaxa latexo vatimol tahal Sudah mei latemos e xil: Daniel, Hananaea, Misel, e Asaraea. 7 Vat Aspenas biles hise xatel mak: mi Daniel, miling viles hisen be 'Beltesasar', Hananaea, hisen mei be Sadrak; Misel, hisen mei be Misek; e Asaraea hisen mei be Abednego.

8 E Daniel pol ni nenemien nan tengan ven imese pe met Hi. Misak ni xi bit naxa ti anien mu namu ti uaen xa tamese ti pe met Hi xa nggo nim ma suv toto. Ma xi misis Aspenas, xa be vat te eilep xil e nim ma suv toto tengan vatutou ni. 9 E Hi pol ni Aspenas mei ien bei Daniel e en misae en. 10 E Aspenas biteni mi Daniel bit, “E-e, nasakras vengan xa uluk mikan ni suv toto navan, vengan xi iaxa tehosei anien eah xa mua ni e uaen eah xa mumu ni. Xosxa ipusi xa vem navos ti naxoni horam maxoe sav xil ak, ma xos mei ihas vin nou.”

11 Ma Daniel mei misepin del xat mereketeh xa Aspenas tehosei tengan ilaxat xi itel Hananaea, Misel e Asaraea, e biteni mini bit, 12 “Matsisuk li tengan usak pis xametel melengien ihe hexalu (10). E melengien xil ak, usa anien hon xa kovi tovuol en itel oei tang mi xametel. 13 Ti, ulepis vemetel itel ve horam maxoe sav xil xa di langga anien xa suv toto tesemae ni. Ti, upus ti xa itep.” 14 Ma xi maen xatel tengan latisak pisi ha ituxoh melengien ihe hexalu (10).

15 Melele xa melengien hexalu xil ak mei mitavi, mereketeh ak pusi xa vexatel nggeih e bos pupu mili ngan xil xa di latea anien xil xa suv toto tesemae ni. 16 Ve rin ak, xi maen xatel tengan latianien vehakut imak, e latnaxa ti anien xa suv toto tesemae ni.

17 E mi xatel, Hi misa kilakilen te pispisien xa di e vanuvei nae xil, e misa metisouen te rin sav xil mun mi xatel. E mi Daniel, Hi misak ni mikilakil kuhi ni koute te metuveen xil.

18 E hoxalite te huram tol xa suv toto tesemae ni, Aspenas mileh horam maxoe xil vus ak ba lasoh pe met suv toto Nebukanesa. 19 E melele xa suv toto misepin mi xil vus, xi mikameti xa Daniel, Hananaea, Misel e Asaraea lateli ngan teisav xil e rin xil vus. Misak ni, tehosei xatel tengan mei latipol visali e nim man. 20 E polien natel, suv toto mikameti xa rin xil vus xa misis xil ni, kilakilen natel be hexalu (10) nesao mu mili kilakilen na moletin te leleen xil nan mu moletin te vongou xil.

21 E Daniel texulehi di tepol e nim ma suv toto ak teha tetuxoh huram kokot xa Saeros, suv toto tahal Persia, mei texur tan xil vus tahal Babilon tehe nan.